Sallata ruse: receta ideale për festa!

Për të pregatitur këtë sallatë na nevojiten 4 enë të veçanta në të cilat do të ziejmë perimet në ujë të kripur: patatet e prera në kubik mesatar (7-10 minuta), karrotat e prera në feta apo në kubik (5-7 minuta), bizelet e ngrira (3-4 minuta) dhe vezët (7 minuta).

Pasi të ketë perfunduar zierja, por perimet të mos jenë zbutur shumë, i vendosim të gjitha në një kullojëse derisa të humbasin ujin e tepërt ndërsa vezët i presim në copa të vogla duke i lënë mënjanë (të njëjtën gjë bëjmë edhe me kastravecat turshi).

Kur perimet të jenë të vakta, i hedhim në një tas të madh qelqi bashkë me kastravecat turshi dhe i rregullojmë me pak vaj ulliri, uthull, pak kripë dhe pak piper.

Në momentin që janë ftohur plotësisht, në tas shtojmë edhe vezët e prera në copa të vogla dhe së fundi majonezën. E vendosim sallatën ruse në frigorifer për të paktën një orë për të lejuar shijet të bashkohen me njëra tjetrën.

E vendosim sallatën në nje pjatë të cekët duke e lyer sipër me një shtresë të hollë majonezë dhe e zbukurojmë sipas dëshirës dhe rastit: me fetat vezësh të ziera, kastraveca turshi, speca gogozhare, karrota të ziera, ullinj, kaperi etj.

1. përdorni një majonezë cilësore, akoma më mirë nëse është e pregatitur në shtëpi
2. pritini përbërësit në mënyrë uniformë dhe të rregullt
3. mos shtoni perime të pabëra
4. mos shtoni përbërës që lëshojnë ngjyrë, psh rrepa të kuqe
5. mos shtoni më tepër seç duhet përbërës të cilët cënojnë delikatesën që ka kjo sallatë (psh shumë kastraveca turshi)
6. mos shtoni perime që përmbajnë shumë ujë
7. kastravecat turshi shtohen atëherë kur perimet janë akoma të vakta, për të harmonizuar shijet
8. sallata ruse nuk duhet të përmbajë më shumë seç duhet majonezë, funksioni i saj i vetëm është të lidhë përbërësit