Patate në furrë

Patatet i qërojmë, i lajmë dhe i presim në formën tonë të preferuar. Do ishte mirë që madhësia të ishte pak e shumë e njëjtë, në mënyrë që të gatuhen njëtrajtësisht. I vendosim në ujë të ftohtë për disa orë. Ujin e ndërrojmë disa herë, sa më shpesh aq më mirë. Kjo ndihmon që të largohet niseshteja dhe të bëhen kërce.

I ziejmë patatet për 5 minuta në ujë me kripë, pasi ti kemi bërë shpëlarjen e fundit. Kujdes! 5 minuta nga rifillimi i zjerjes së ujit, jo nga hedhja e patateve në ujë.

I kullojmë mirë dhe i vendosini në tavë. I japim shije me kripë, vaj ulliri dhe erëza sipas dëshirës (ne kemi të preferuar rigonin/trumëzën ose rozmarinën). Për më shumë aromë shtojmë edhe thelpinjë hudhrash të plotë me gjithë lëkurë. I përziejmë mirë me dorë.

I pjekim patatet për rreth 35 minuta në 180°C dhe më pas e rritim temperaturën në 200-220°C derisa të kenë marrë ngjyrë të bukur.

Lloji i patates ka shumë rëndësi: perfekte do të ishin ato me tulin e verdhë, jo të bardhë.