Pica të vogla me krem djathi

Vendosim në robotin e kuzhinës kremin e djathit, miellin, gjalpin dhe pak kripë dhe i përziejmë derisa të formohet një top brumi. Nëse brumi ngjit në duar, shtojmë edhe pak miell. E punojmë pak me dorë, e mbështjellim me qese celofoni dhe e vendosim në frigorifer për rreth 20 minuta në mënyrë që hapja e tij të jetë më e lehtë.

Pasi të ketë kaluar kjo kohë, e hapim brumin në tavolinën e punës të lyer me pak miell dhe formojmë pica të vogla me ndihmën e një forme të rrumbullakët ose të një gote (madhësia sipas dëshirës). I vendosim picat në një tavë të shtruar me letër furre, i lyejmë me një lugë të vogël salcë domatesh, i spërkasim me pak rigon/borzilok dhe i pjekim në furrë të parangrohur në 200°C për 5 minuta. Pas kësaj, i nxjerrim nga furra, shtojmë pak djathë mocarela të grirë, dhe i pjekim sërisht për 10 minuta të tjera. I shërbejmë të ngrohta.

Sipas dëshirës picave mund ti shtoni çfarë të dëshironi: copëza proshute, cironka, ullinj, kaperi, salçiçe, domate të thara etj.