Sushi të bëra në shtëpi

E shpëlajmë orizin shumë mirë nën ujë të ftohtë të rrjedhshëm derisa uji të rezultojë plotësisht i pastër. Në këtë mënyrë eleminojmë niseshten dhe kokrrat e orizit nuk ngjiten me njëra tjetrën.

Vendosim në një tenxhere orizin e shpëlarë dhe ujin, dhe e gradojmë nxehtësinë në maksimum. Sapo të shohim bulëzat e para në sipërfaqe të ujit, e ulim zjarrin në minimum, vendosim kapakun dhe e mbështjellim mirë kapakun me një pecetë pambuku të pastër në mënyrë që ta izolojmë komplet. E lëmë orizin të thithi ujin për rreth 10 minuta. Orizi është gati kur janë formuar gropëzat klasike në sipërfaqe. Duhet të kemi kujdes që gjatë kësaj kohe mos ta përziejmë asnjëherë!

Ndërkohë shkrijmë kripën dhe sheqerin në uthullën e orizit.

E hedhim orizin në një pjatancë ose pjatë të cekët dhe i japim shije me uthullën e orizit duke e përzierë mirë. E lëmë të ftohet pak, dhe vetëm kur orizi të jetë i vakët fillojmë me pregatitjen e sushit.

Veshim tapetin e bambu-së ose të silikonit me qese celofoni përpara se të pregatisim sushin. Kjo do të bëj që ta përdorim disa herë dhe nuk do kemi nevojë që ta lajmë.

Njëkohësisht ndajmë fletët e algave në dy pjesë. Kështu do të përftojmë më shumë sushi, më të vegjël në madhësi dhe më të menaxhueshëm për tu ngrënë.

Presim kastravecin në formë fije shkrepsesh ose alla Julienne. Presim në feta të holla avokadon dhe ndajmë përgjysmë surimin.

Në tapetin e bambusë vendosim një fletë alge dhe shtojmë një grusht oriz të cilin e përhapim mirë në të gjithë sipërfaqen. Përhapja duhet të bëhet me gishta të lagur, prandaj mbani GJITHMONE pranë vetes një tas të vogël me ujë dhe pak uthull orizi. Me një lëvizje shumë të shpejtë, e kthejmë algën nga ana tjetër, në mënyrë që orizi të jetë në kontakt me qesen e celofonit dhe alga sipër. Vendosim mbushjen në mes të algës, pra disa fije kastravec, avokado dhe surimi. Mos e mbushni shumë, ose sushi nuk do të rrotullohet dot dhe nuk do të "ngjitet". E rrotullojmë me kujdes sushin duke ushtruar pak presion në mënyrë që mbushja të jetë sa më shtrënguar në brendësi të algave, në rast të kundërt do kemi problem gjatë prerjes. Kur e kemi përfunduar rrotullimin, e spërkasim sipërfaqen bollshëm me susam të pjekur.

Me ndihmën e një thike të mprehtë, e ndajmë fillimisht sushin në dy pjesë, pastaj dy pjesët në katër duke i ndarë përgjysmë dhe katër pjesët në tetë. Me një algë do të formojmë 8 sushi. Mbani GJITHMONE pranë vetes një peshqir të lagur, dhe pas çdo prerje fshijeni tehun e thikës me peshqir.

Bashkojmë majonezën me salcën pikante dhe me peshkun ton të kulluar shumë mirë nga uji ose vaji. Rregullojeni sasinë e salcës pikante (Srirachi) në varësi sesa e toleroni shijen pikante.

Vendosim në tapetin e bambusë një fletë alge dhe shtojmë një grusht oriz duke e përhapur me gishta të lagur. Në mes vendosim mbushjen me peshk ton në mënyrë gjatësore dhe e rrotullojmë mirë sushin duke ushtruar pak presion. E ndajmë në 8 pjesë si më sipër duke e prerë me thikë të mprehtë.

Veprojmë identik në të njëjtën mënyrë si për California rolls, vetëm ndryshojmë mbushjen, pra: salmon të tymosur, djathë Philadelphia dhe kastravec.

Përpara se të vendosim mbushjen në secilën prej 3 llojeve të makit të sugjeruar më sipër, mund ta lyejmë bazë me pak salcë pikante wasabi. Por kjo është gjithmonë në varësi të preferencës!