Japrak me gjethe rrushi

Si fillim, lajmë mirë gjethet e rrushit dhe i ziejmë në ujë të vluar me kripë për rreth 5 minuta. I heqim nga uji duke i kulluar, i fshijmë mirë dhe i vendosim në tavolinën e punës.

Ndërkohë pregatisim mbushjen: skuqim në vaj ulliri qepën dhe hudhrën të prera hollë derisa të zbuten. Shtojme orizin, menten, koprën, majdanozin, kripën, pak piper dhe duke i shtuar gjysmë gote ujë të nxehtë i lëmë të ziejnë për rreth 10 minuta duke i përzierë herë pas here në mënyrë që orizi të mos ngjitet.

Masën e përftuar e lëmë të ftohet, dhe kur të jetë ftohur vendosim nga ajo një lugë të vogël mbi çdo gjethe rrushi në ekstremitetin aty ku gjendet këmba. E mbyllim gjethen fillimisht anash më pas e rrotullojmë që të mos dal mbushja.

Në një tavë të thellë rendisim japrakët njëri pas tjetrit dhe shtojmë gjysmë gote ujë me kripë dhe me lëng limoni. E mbyllim me kapak dhe i fusim në furrë në temperaturë 120 gradë për 1 orë e gjysmë. I servirim të ftohta.

Nqs përdorni gjethet e rrushit në kuti, lërini në ujë për të paktën 12 orë, kullojini dhe fshijni mirë. Nqs nuk keni gjetur gjethe rrushi, japrakët mund të pregatiten gjithashtu me gjethe lakre të cilat i ziejmë fillimisht. Për më tepër kjo antipastë është e përkryer për të shoqëruar pjatat e peshkut.