Kërnacka të furrës

Si fillim, lagim bukën e ndenjur me pak ujë, e shtrydhim, e thërrmojmë me duar dhe e vendosim në një enë të thellë. Shtojmë mishin e grirë, qepët e grira hollë, vezën, majdanozin e grirë, thelpinjtë e hudhrës të grira, piperin dhe kripën.

Masën e përftuar e ndajmë në racione të vogla dhe i japim formë cilindrike. I kalojmë në miell dhe i skuqim në vaj të nxehtë derisa të marrin ngjyrë të kuqerremtë nga të gjitha anët. Pasi i kemi skuqur të gjitha kërnackat i rreshtojmë në një tavë dhe fillojmë me pregatitjen e salcës:

Në vajin e mbetur, shtojmë miellin duke e përzierë mirë që të mos formohen kokrriza, e shuajmë me uthull, shtojmë salcën e domateve (apo domaten e grirë), pak ujë të nxehtë, kripë, piper, dafinë, rigon, specin e kuq dhe hudhrat e grira hollë. E lëmë në këtë mënyrë të gatuhen të gjithë përbërësit së bashku për rreth 10 minuta dhe më pas këtë salcë ia hedhim kërnackave që kemi shtruar në tavë. Tavën e fusim në furrë të parangrohur në 180°C për 15-20 minuta. Kjo pjatë shërbehet e spërkatur me lëngun e saj dhe me majdanoz të freskët e të grirë hollë.