Qofte me mish të grirë

Lagim bukën në qumësht, e shtrydhim me dorë, e thërrmojmë dhe e bashkojmë me të gjithë përbërësit e tjerë: mishin e grirë, qepën dhe hudhrën të grira shumë hollë (ose të kaluara në mikser), vezët, rigonin, kripë dhe pak piper.

E përziejmë brumin e qofteve me dorë dhe e lëmë të pushojë për të paktën 1 orë mbuluar me qese transparente. Sa më shumë të qëndrojë brumi, aq më mirë lidhen shijet me njëra tjetrën dhe aq më të shijshme bëhen qoftet.

Me duar të lagura, marrim pjesë nga brumi dhe i japim formën karakteristike të qofteve, i kalojmë në miell dhe i skuqim në vaj të nxehtë (nxehtësi mesatare) nga të dyja anët derisa të marrin ngjyrë të kuqerremtë në sipërfaqe.

I heqim nga zjarri dhe i vendosim mbi një pjatë të shtruar me letra kuzhine për t’i thithur vajin e tepërt. I servirim të ngrohta.