Ragu bolonjeze (kimë me mish të grirë)

Kavërdisim në vaj ulliri në zjarr të ulët qepën, karrotën dhe selinonë të prera shumë hollë, derisa të zbuten. Shtojmë mishin e grirë të viçit dhe të derrit (unë e zëvendësoj herë pas here me pançetë të tymosur, por mund ta bëni dhe vetëm me mish viçi). E lëme derisa kima të rezultojë e thatë, pra pa lëngjet që lëshon në fillim mishi, vetëm me yndyrën e vet.

E shuajmë me 1/2 gote verë të bardhë dhe e lëmë derisa të avullojë alkooli. Shtojmë 1 lugë gjelle koncentrate domatesh, kripë, piper të zi dhe shtojmë ujë. Raguja duhet të ziejë për rreth 3 orë në zjarr të ulët, prandaj shtojmë nga një filxhan çaji herë pas here kur e shohim që shterron. Kur ragu-ja është gati, i shtojmë në fund një filxhan kafe qumësht. Kjo i jep kremozitet dhe e bënë shijen më të butë.