Byrek me spinaq

Shkrijmë kripën në ujin e ngrohtë dhe ja shtojmë miellit bashkë me vajin e ullirit. E punojmë brumin shumë mirë me dorë derisa të mblidhet dhe të rezultojë i butë. E mbulojmë me një pecetë të pastër dhe e lëmë të pushojë për 30-60 minuta. Në këtë mënyrë aktivizohet gluteni dhe petët hapen më lehtësisht.

Kavërdisim qepën në vaj ulliri derisa të zbutet. Shtojmë spinaqin dhe e mbulojmë tiganin me kapak në mënyrë që spinaqi të ulë vëllimin e tij. I japim shije me kripë, piper të zi, kopër, majdanoz dhe djathin e bardhë. E heqim nga zjarri dhe e lëmë mbushjen të ftohet në temperaturë ambjenti.

Brumin e ndajmë në 15 pjesë të barabarta dhe i hapim 8 petë poshtë dhe 7 petë sipër duke i lyer me niseshte. Nga peta në petë i lyejmë me pak vaj në mënyrë që të bëhen të shkrifta gjatë pjekies. Pjesa e poshtme duhet gjithmonë të ketë më shumë petë pasi të gjitha lëngjet e harxhës do të precipitojnë në fund.
Ne mes shtrojmë harxhën tashmë të ftohur.

E presim byrekun duke mos e cuar thikën deri në fund dhe e pjekim në 200°C për 40 minuta ose derisa shtresa e sipërme të jetë bërë kerce dhe të ketë marrë ngjyrë të artë. E kthejmë byrekun përmbysë në një tavë tjetër. Kjo bëhet për të zbutur petën e sipërme e cila është gjithmonë më e fortë. Ose mund ta lagim sipërfaqen e byrekut me pak ujë dhe ta mbulojmë me një pecetë të pastër. E lëmë të pushojë për 10 minuta përpara se ta shërbejmë

E shoqërojmë me një sallatë jeshile dhe kos grek ose salcë kosi.