Tortë Tenerina

Për të pregatitur këtë tortë fillimisht coptojmë çokollatën e zezë dhe e vendosim të shkrijë në banjomari ose në zjarr shumë të ulët derisa të bëhet kremoze. Presim gjalpin në kuba të vegjël dhe ia shtojmë çokollatës akoma në zjarr, duke pasur kujdes që copëzat e gjalpit të kenë shkrirë plotësisht përpara se të hidhen të tjerat. Kur i gjithë gjalpi të ketë shkrirë, e heqim masën nga zjarri dhe e lëmë të ftohet.

Ndërkohë, rrahim të verdhat e vezëve me sheqerin derisa të përftojmë një përbërje kremoze (kjo mund të arrihet me pirun ose me rrahës elektrik) dhe gjithmonë duke e rrahur shtojmë çokollatën me gjalpin e shkrirë, qumështin e vakët, miellin dhe i përziejmë të gjitha bashkë.

Në një enë të veçantë, rrahim të bardhat e vezëve me pak kripë derisa të formohet një krem kompakt; më pas, me anën e një spatule ia shtojmë këtë përbërje brumit me çokollatë duke e perzierë me kujdes nga poshtë lart. Lyejmë me gjalp dhe miell një formë të rrumbullakët për torta me diametër 24 cm, hedhim në të brumin e pregatitur dhe e vendosim në furrën e parangrohur në temperaturën 180°C për 25-30 min.
Pasi të jetë pjekur (bëjmë provën e pirunit), e lëmë të ftohet brenda në furrë. Në momentin e servirjes, e presim tortën në copa dhe e zbukurojmë sipër me sheqer pluhur ose kakao pluhur.

Për këtë recetë mund të përdoren variante të ndryshme: në vend të qumështit, shtojmë një vezë tjetër mesatare. Nqs nuk i rezistoni dot çokollatës, mund të zëvendësoni 3 lugë miell me 3 lugë kakao të hidhur, por kujdes! Duhet patjetër të rrisni sasinë e sheqerit (2 lugë).