Krapfen (bombolone)

Në një enë të thellë hedhim 2 lugë sheqer, 2 lugë gjalp, qumështin e ngrohtë në të cilin kemi tretur majanë e birrës, vezët e plota, vaniljen dhe pak kripë. I përziejmë të gjitha bashkë derisa përbërësit të shkrihen tek njëri tjetri dhe pas kësaj shtojmë miellin. Vazhdojmë rrahjen derisa të formohet brumi relativisht i butë, por që të shkëputet nga dora. Masën e punojmë me dorë në një sipërfaqe horizontale për rreth 5 minuta (në këtë mënyrë bombolonet bëhen më të buta) dhe duke i shtuar miell nqs është e nevojshme. Brumin e vendosim në një vend të ngrohtë të mbuluar me një pecetë derisa të fryhet për 1 orë -1 orë e 1/2.

Kur brumi të jetë gati e vendosim në sipërfaqen horizontale të spërkatur me miell dhe formojmë me të një petë të trashë rreth 1/2 cm. Me ndihmën e një gote (apo forme të rrumbullakët) presim 12 rrathë të cilët i lëmë të fryhen edhe për 1/2 orë.

Në një tigan hedhim mjaftueshëm vaj dhe i skuqim bombolonet për 2 minuta nga secila anë derisa të kenë marr një ngjyrë kafe të errët. I vendosim në një pjatë të madhe mbuluar me letra thithëse për t'i hequr vajin e tepërt. Kur bombolonet të jenë ftohur, me ndihmën e një thike me majë të mprehtë hapim një zgavër në të cilën fusim reelin me anë të një luge të vogël. Së fundi, i spërkasim me sheqer pluhur.